One video wey show as Nigerian and French soldiers dey offload supplies with attention don go viral for social media.
Di video comot di same time as pipu dey try understand di real tin wey join France with Nigeria.
Inside statement on Thursday, Mohammed Idris, minister of information and national orientation, deny di claims sey Nigeria don give parts of di kontri to France.
Di minister make di statement afta accusations begin comot sey Nigeria bin dey join head with France to scata Niger Republic wit terrorism.
Some weeks before, Mahdi Shehu, one pesin wey dey comment onto public affairs and politics mata, claim sey plans bin dey to build French military base for di northeast afta Femi Oluyede, chief of army staff (COAS), bin reportedly welcome French soldiers for di kontri.
Howeva, di defense headquarters tok sey di accusations dey “baseless”.
Ontop di statement wey di minister make on Thursday, Shehu tell am sey make im stop dey deny di mata.
For di video wey folo di post wey im don delete, engine bin dey sound for back as Nigerian army bin dey offload sacks of supplies, including bags of rice, from moto, while French soldiers bin dey unload aircraft from one cargo plane.
Vehicles dey pass as uniform pipu bin dey move around wit dia boots for ground.
Two buses, one wit French flag, come later cari di army pipu.
For di video, one Nigerian soldier tok sey di army pipu bin just dey comot from di peacekeeping centre where dem train dem for counterterrorism.
Howeva, TheCable discover sey di video don dey online since January 2013.
Di Associated Press (AP) report sey di troops bi part of military mission from di Economic Community of West African States (ECOWAS) to help di peacekeeping operation for di region.
“Na 156 Nigerians, 100 Togolese, 25 from Benin, and 25 others (from Benin) wey dey come dis night,” one French colonel, according to di AP, tok for di video.
Di troops bin just arrive for di Senou International Airport, Bamako, Mali— one of di kontris wey di peacekeeping mission bin suppose operate.
