Matthew Kukah, Catholic Bishop of Sokoto diocese, don claim sey President Bola Tinubu no sign di peace accord during di 2023 presidential election.
Kukah tok on Sunday, during di Edo election security town hall meeting for Benin.
“Wetin folo dey interesting be sey di current president, di time im be presidential candidate, no sign am. No be our fault sey di political opposition no take advantage of am,” na so di Catholic Bishop tok.
Di Catholic Bishop claim don gada plenti attention, with some Nigerians wey dey question weda wetin im tok correct.
PEACE ACCORDS FOR NIGERIA
With different tins wey hapun before di 2015 election, dem establlish di national peace committee (NPC) for 2014 to ensure peaceful and credible elections for di kontri.
Di committee, wit Abdulsalami Abubakar, former head of state, as oga, don carry out different peace pacts for candidates wey dey contest political offices for both state and federal levels.
On September 21, pipu for Edo go enter polling unit cast dia votes for candidates wey dem like.
Howeva, concerns about di peace and safety of voters don dey rise, afta di Peoples Democratic Party’s no gree sign di peace accord.
Di PDP tok sey na because dem no trust police.
Godwin Obaseki, governor of Edo, accuse di police of working for di All Progressives Congress (APC), afta dem arrest 10 PDP members. Obaseki claim sey police bin no get enough evidence or valid cases against dem.
Ontop di PDP mata, Kukah tok sey no be di first time wey candidate go refuse sign peace pact.
WETIN WE CHECK
TheCable check di 2023 peace pact report wey NPC publish, notice sey dem bin sign two peace accords for national level, afta di violence wey folo previous elections for di kontri.
Di first pact bin encourage political parties and dia candidates to make sure sey dia goals na confam election campaign strategies instead of misinformation and hate speech. Di candidates sign di pact on September 29, 2022.
Di 2023 presidential candidates gada for di International Conference Centre, Abuja to sign di peace pact for free and credible election for di kontri.
Peter Obi, candidate of di Labour Party (LP); Atiku Abubakar, PDP candidate; Rabiu Kwankwaso, flagbearer of di New Nigeria Peoples Party (NNPP); and Omoyele Sowore, standard bearer of di African Action Congress (AAC) bin all dey di event, except Tinubu, wey dem tok sey bin dey UK.
Na Kashim Shettima, im running mate, bin represent am.
Oda media platforms bin folo report di signing of di first peace pact for 2022, example for here, here and here.
Di second pact, wey dem sign on February 23, 2023, na to make sure sey di candidates go accept di outcome of di election.
Tinubu bin dey di signing of di second pact.
FINAL TOK
Based on confam informate, di claim wey Kukah make sey Tinubu no sign di 2023 election peace pact no correct.
