Vincent Olatunji, National Commissioner of di Nigeria Data Protection Commission (NDPC), claim sey di information and communication technology (ICT) sector don contribute di most to Nigeria gross domestic product (GDP), dat is a total of 16 to 18 percent ova di past four to five years.
Olatunji tok on Wednesday wen im appear on the Prime Time program on Arise Television.
“For di last 4 or 5 years, di ICT sector don make di highest contribution to di GDP, ranging between 16 and 18 percent,” na so im tok.
“And di target for di next few years, if we cari eye look di $1 trillion economy wey Mr President dey pursue, na to make sure sey di digital economy sector contribution to di GDP reach 20 percent.
“And you fit imagine wetin go hapun if oda sectors bring in dia vision wit clear policy plan, we go definitely improve.
WETIN WE CHECK
CableCheck look di GDP informate from di National Bureau of Statistics (NBS) for 2021 reach di third quarter of 2024.
Di informate show sey for 2021, di agriculture sector naim be di largest contributor to Nigeria GDP, accounting for 25.88 percent, followed by trade at 15.69 percent, and ICT at 15.51 percent.
In 2022, na still agriculture be di top contributor with 25.58 percent, followed by ICT at 16.52 percent, and trade at 16 percent.
In 2023, agriculture remain di leading sector with 25.18 percent, followed by ICT at 17.34 percent, and trade at 15.83 percent.
Di informate for 2024 neva comot. Howeva, di available informate cover Q1 to Q3.
In Q1, di agriculture sector contribute 21.08 percent, ICT contribute 17.88 percent, and trade contribute 15.70 percent to di GDP.
In Q2, agriculture contribute 22.61 percent, ICT contribute 19.77 percent, and trade contribute 16.39 percent.
In Q3, agriculture contribute 28.65 percent, ICT contribute 16.36 percent, and trade contribute 14.78 percent.
FINAL TOK
Based on the confam informate, di claim wey tok sey ICT sector dey always contribute di highest to Nigeria GDP ova di last four years no correct. Agriculture naim don consistently contribute di most for di years wey we check.
