Ótù onye na soshal mịdia ekwuola na ụlọikpe ndị omekome nke mba ụwa bụ International Criminal Court (ICC) enyela iwu ka ndị uwe ojii kpọchie onye isi ụlọ omeiwu Naijiria bụ Godswill Akpabio na ǹgá.
Ozi a nke otu asafe na Facebook bụ @VoiceUpNaija biputara enwetala nkwenye otu narị na iri anọ (140 likes), ntụnye ọnụ iri itoolu n’abụọ (92 comments), na nkesa iri isii n’abụọ (62 shares).
Ụfọdụ asafe na Facebook nakwa LinkedIn kesakwara nya bụ ozi
“Ozi mgberede: ICC enyela iwu ka a kpọchie onye ịsị ụlọ ome ịwụ Naijiria na ngá maka ebubo akwamịkọ,” ozi a kwụrụ.
“Ụlọ ikpe International Criminal Court (ICC) amabidola onye isi ụlọ omeiwu Naijiria iwu ịga obodo ọzọ, ma nye iwu ka a kpọchie ya na nga ma a hụ ya n’obodo ọbụla.”
Ozi a na-abịa n’ihi nghọtaghe nke dị n’etiti Akpabio na Natasha Akpoti-Uduaghan, onye omeiwu na-anọchite anya ndị Kogi central, n’ihi ọnọdụ oche na ụlọ omeiwu kacha elu na Naijiria.
Ka nke a gachara, ụlọ omeiwu senate wegara nya bụ okwu nye nnokọ na-ahụ maka ikpe gbasara ezi àgwà, ọnọdụ ruru onye na mkpesa ndị omeiwu, iji taa Akpoti-Uduaghan ahụhụ ruru ya.
N’ụbọchị iri abụọ n’asatọ, Akpoti-Uduaghan bòrò Akpobio ebubo na ọ kpasoro ya agwa dịka ọ chọrọ ịkwasaya iko n’ike n’ime ụlọ ọrụ ya nakwa n’ụlọ ya nke dị na Akwa Ibom steeti.
E nyere ya oche azụ ọnwa isii n’ụbọchị isii nke ọnwa March n’ihi nsogbu gbasara ọnọdụ oche n’ụlọ omeiwu nke Naijiria.
N’ụbọchị iri n’otu nke ọnwa March, onye senator nke Kogi a kpesara oche azụ a e nyere ya nye nnokọ mba ụwa nke ụlọrụ United Nations (UN) bu Inter-Parliamentary Union (IPU).
ICC Ò NYÈRÈ ÌWÚ KÀ Á KPỌ̀CHÍÉ GODSWILL AKPABIO NÀ ǸGÁ?
ICC bụ ụlọ ikpe ndị omekome mba ụwa nke na-enyoba anya ma na-emegide ndị mmadụ e bòrò ebubo arụ dị ụkwụ n’obodo ọbụla.
Inyocha okwu a, CableCheck lebara anya na webusite ICC ịmata ma ha ebiputara nya bụ ozi maka ịnwụchi onye ome iwu a, mana anyị ahụghị ihe dị otu ahụ.
Anyị chọpụtakwara na onweghị ụlọ ozi bipụtara nya bụ okwu.
CableCheck kpọtụkwara Fadi El-Abdallah, onye nkwuchita ọnụ ICC, onye kwuru na onweghị ozi ịnwụchi Akpabio maọbụ onye ọbụla si Naijiria ha bipụtara.
El-Abdallah kwuru na ọ bụ ọrụ ICC ikwuputa mbido nnyocha ọbụla ha na-akwado ime na webusite ha tupu ha enye iwu ka a kpọchie onye dị ótú ahụ.
“Enweghị iwu ịkpochi onye ọbụla na Naijiria. Ebe ndị na-eme nya bụ nchọpụta e kwupụtabeghị nya bụ ozi na webusite ha, usoro dị mkpa tupu ICC enye iwu maka ịkpochi onye dị ota a,”El-Abdallah kwara Cablecheck site na ozi email.
ŃCHỊ́KỌ́TÁ
Ozi na ICC enyela iwu ka a kpọchie Akpabio na nga bụ asị.
