Nyesom Wike, onye minista nke isi obodo Naijiria bụ FCT, kwuru na Peter Obi, onye bụ buru gọvanọ Anambra steetị na onye jiri òtù Labour Party zọ ọkwa onye isiala n’afọ 2023, ahazighị ntụliaka ọchịchị mpaghara mgbe ọ́ chị̀rị̀.
Wike kwuru nke a na Abuja n’ụbọchị Sunday, n’ụlọ ụka St. James Anglican Church dị na Asokoro, mgbe ọ gara ụka ekele maka ọrụ ngo ndị o hibere na Abuja.
Ọ pụtara ìhè na onye minista na-akọ ndị ndu partị na-ama ọchịchị onye isi ala Bola Tinubu áká n’ihu ọnụ, ma na-ebokwa ha ebubo na ha na-achọ ọdịmma nke onwe ha.
“Ị kwuru na Peter Obi ga-abụ onye isi ala. Onye isi ala na ebee? Ụfọdụ n’ime ụnụ na-akwado onye ụnụ n’amaghị, ụnu na-akwado n’ihi obi ebere,” Wike kwụrụ.
“Ọ bụ gọvanọ afọ asatọ, ọ meghị ntụliaka ọchịchị mpaghara. Iwe e nweghị ndị Naijiria na ọ jụrụ ime ntụliaka ọchịchị mpaghara. Afọ asatọ o ji bụrụ gọvanọ Anambra, ị kpọrọ nke ahụ ọchịchị onye kwa uche ya? Naanị otu nwoke bụ gọvanọ na onye isi mpaghara niile nke steeti ya.”
Okwu Wike na-abịa ka ụbọchị ole n’ole gachara dịka patị na-anọghị n’ọchịchị bịakọtara ọnụ were họpụta African Democratic Congress (ADC) dịka patị a ga-eji wepụ Tinubu n’ọchịchị n’afọ 2027.
Okwu ya kpalitere mgbagwoju anya ma Peter Obi o mere ntụliaka na Anambra mgbe ọ bụ gọvanọ.
ŃTỌ́GHÉ ÁKỤ́KỌ́
Tupu ụlọ ikpe kachasị elu na Naijiria enye iwu maka nwere onwe ọchịchị mpaghara n’ọnwa Julaị nke afọ 2024, ndị gọvanọ nwere ikikere ebe ọchịchị mpaghara nọ.
Ọ́bú ihe pụtara ìhè na ọchịchị steeti ga ejide ego ọchịchị mpaghara ma họpụtaka onye nlekọta nye ọchịchị mpaghara nọ na steeti ha.
Ụlọ ikpe dị elu nyere iwu ka ego ruru ọchịchị mpaghara bụrụ nke akwụnyere ọchịchị mpaghara, iji kwalite ọchịchị onye kwa uche ya na mpaghara niile nọ na Naijiria
Peter Obi bụ gọvanọ Anambra site n’afọ 2006 rụọ 2014, nke ọchịchị ya nwere ọtụtụ ịma aka n’ihu n’ihi nwepu ewepụrụ ya n’ọchịchị mgbe ọ bụ gọvanọ.
ÍNYÒCHÀ ÓKWÚ À
CableCheck chọpụtara na n’ụbọchị iri n’abụọ nke ọnwa Januwari nke afọ 2014, ka ọ fọdụrụ ọnwa abụọ ka Obi pụọ n’ọchịchị, emere ntụliaka elu ọchịchị mpaghara iri abụọ n’otu (21LGAs) dị na steetị Anambra.
Mgbe ahụ, patị All Progressives Grand Alliance (APGA),nke nọ n’ọchịchị meriri mpaghara iri abụọ n’ime mpaghara iri abụọ n’otu (20 of 21 LGAs), nya na ọkwá ndị councilor narị atọ n’anọ n’ime narị atọ n’rie abụọ n’isii (304 of the 326 counsellorship seats).
N’ụbọchị iri n’atọ nke ọnwa Januwari nke afọ 2014, ka ụbọchị atọ gachara site n’ụbọchị e mere ntụli aka élú ọchịchị mpaghara. Obi nabatara ndị merịrị na ntuliaka ahụ, ma yọ ha ka ha na Willie Obiano, onye meriri na ntụliaka gọvanọ emere na steetị ahụ mgbe ahụ, rukọ ọfụma.
CableCheck chọpụtakwara na nya bụ okwu bụ nke enyochagoro na mbụ, mgbe Reno Omokri, onye bụ buru onye ọrụ ọchịchị otu onyeisiala, kwuru otu okwu a n’ụbọchị iri n’abụọ nke ọnwa Julaị nke afọ 2024.
ŃCHỊ́KỌ́TÁ
Okwu na Peter Obi emeghị ntụliaka ọchịchị mpaghara na Anambra mgbe ọ bụ gọvanọ bụ asị.
