One viral video wey show as dem mount dead bodi for wetin resemble mass grave be like e hapun for Nigeria.
On August 30, one X account wit di handle @emmasocket post video wey show as men inside camouflage dey shoot pipu wey dey run.
Di account cari di picture of Simon Ekpa, self-acclaimed disciple of Nnamdi Kanu, detained leader of di proscribed Indigenous People of Biafra (IPOB).
For di scata scata video wey be like sey dem shoot am for dry land, dem dump plenti dead bodi for inside shallow ground.
“Make di world sabi di secret war wey dey hapun for di land of Biafra,” na so di X user tweet.
“We no fit take am again, and di only solution to di madness for di zoo wey dem dey call Nigeria na make di kontri scata. BIAFRAN all ova di world @simon_ekpa and di entire cabinet members dey for us.”
As of di time wey dis tori comot, di tweet don gada pass 1k views, 76 likes, and 60 retweets.
On August 31, @AmadiohaOd3671, one X account wey get bigger following, repost di video and e claim sey “dia main plan no be islamisation but na land grabbling and total control of Nigeria by Fulani and Western interest.”
Although di account no specify who dem troway di accusations give, previous claims in di past don suggest sey di same religious status of di president and vice president na attempt to Islamise di kontri.
So far, di post don gada 48.3k views, 819 retweets, 627 comments, and ova 100 likes and bookmarks each.
Di killings happen for Nigeria?
WETIN WE CHECK
To check weda di video don comot before, TheCable cari plenti screenshots of di video check for Google reverse image search.
Results from di search show sey di earliest version of di video comot on August 26.
According to di post wey folo am, na di Jama’at Nusrat al-Islam wal Muslimeen (JNIM), Al Qaeda-linked militant group, cause di killings for Burkina Faso.
Di post tok sey JNIM kill ova 200 and wound 140 as villagers bin dey assist security forces to dig pit wey dem for use build defend outposts.
Some bots bin folo repost di video wit di same tori.
On August 28, War Noir, one independent weapons and conflicts researcher, post di video, add sey di incident happen for di Burkinabe town of Barsalogho.
Media reports confam sey di attack happen on August 24 wit women and children among di victims.
The United Nations (UN) describe di attack as horrific and dem urge di Burkina Faso transition authorities sey make dem make sure sey those pipu wey dey responsible go face punishment.
In addition, Edward Buba, director, of defence media operations, release statement wey tok sey di incident no hapun for Nigeria.
“Make evribody know sey di incident no hapun for Nigeria. Rather, e sadly hapun for nearby African countrywey dey face terrorism,” na so Buba tok.
“On di whole, we dey urge di public to shine eye read tori wey terrorists fit dey spread to cause misinformation, disinformation, and fake news as part of dia war propaganda effort. These situations no be new tin for war,” na so im add.
FINAL TOK
Claims wey tok sey di attack inside di viral video wey show as plenti dead bodi ful grave hapun for Nigeria no correct. Di attack happen for Burkina Faso.
