One post for social media platforms claim sey di national assembly don pass di “Cybercrimes Act 2025” into law.
Dem mostly di post for X, WhatsApp, and Facebook.
Di post also claim sey di provision of di alleged law “now dey fully binding and enforceable across Nigeria”.
“Di new Cybercrimes Act 2025 don officially become law by di National Assembly under Senate President Godswill Akpabio. Dis mean sey evri provision for di Cybercrimes (Prohibition, Prevention, etc.) Act now dey fully binding and enforceable across Nigeria,” na so part of di post read.
“If you be online user, content creator, or admin of any digital platform (WhatsApp, Facebook, Telegram, etc.), you must know wetin dis law dey tok — because ignorance no go be excuse.”
Di viral post claim sey one of di provisions of di alleged law be sey anybodi wey access anoda pesin phone without permission fit get “punishment of up to 5 years for prison”.
Multiple X users folo publish di post in almost di same style, along wit foto of Akpabio, di senate president.
Daddy Freeze, one popular Nigerian media personality, post screenshot of di blogspot wey publish di viral post for Facebook come write: “Beta Work Senator Akpabio; Wow Dey Careful wit wetin you dey post for Social Media. Wetin You Think About Dis Law”.
One X user — @emmaikumeh — publish di viral post togeda wit warning, “as I see for WhatsApp”. Di post, wey comot on August 23, don gada over 200 reposts, 30 quotes, and 400 likes so far.
Some of di posts dey saved here and here.
WETIN WE CHECK
CableCheck observe sey Nigeria no get any law as: “Cybercrimes Act 2025”. Di law wey di kontri get ontop cybercrimes mata na di “Cybercrimes (Prohibition, prevention, etc.) (Amendment) Act 2024”.
President Bola Tinubu pass di law on February 28, 2024. Di 2024 legislation bin correct some parts of di Cybercrimes (Prohibition, Prevention, etc.) Act 2015.
CableCheck also notice sey di post start to dey trend for social media in early August – di period wey jam wit di yearly holiday of di national assembly.
On July 23, di senate go dia holiday and dem suppose resume September 23.
Di house of representatives folo go dia yearly holiday on July 27. Dem no fit pass di alleged law wen both chambers of di national assembly dey holiday.
Di tins wey di viral post no align wit di provisions for di Cybercrimes Act 2024.
FINAL TOK
Di viral post wey claim sey di senate don pass alleged Cybercrimes Act 2025 no correct.
