One video wey show as bridge dey collapse dey waka for social media, especially Facebook.
For di five-second video, di overhead bridge collapse as vehicles dey pass under and pipu dey run from di area.
Some Nigerian social media users post di video with captions wey suggest sey di incident hapun for di kontri.
One Facebook user identified as Goodluck Pyagbara with over 7,000 followers post di video write sey: “How APC 10billion bridge collapse”.
Anoda Facebook user, Eze Ferdinand, post di video write sey: “Look as di flyover bridge just collapse. Wetin dey cause dis collapse?”.
On Wednesday, anoda Facebook user identified as Abass Tom post screenshots of di video and im claim sey di bridge dey Lafia, Nasarawa state.
Di Facebook user claim sey di bridge collapse “three weeks” afta commissioning and sey dem spend “10billion” to construct di bridge.
“Breaking News JUST IN Flyover collapse afta 3 weeks of commissioning for Lafia, Nassarawa State. Dem spend 10 Billion ontop dis project,” na so di Facebook user write.
Some hours afta, di Facebook user edit di caption claim sey di tin hapun for Bihar, India.
“Flyover collapse afta 3 weeks of commissioning for di Khagaria-Aguwani bridge collapse for Bihar. Pictures show as part of di bridge collapse (Source: India Today). Dem spend 10 Billion ontop dis project,” di user come write.
Again, di user change di caption make e show sey di incident no hapun for Nigeria.
CableCheck discover di changes afta we look di edit history.
One Facebook account — Dee Elegantz — wey get ova 11,000 followers also share screenshots of di video join am wit di Lafia, Nasarawa claim.
One Indian X user @ManishCEO post di video, tok sey e hapun for Bihar, one state for India.
Anoda X user also claim sey e hapun for Bihar.
WETIN WE CHECK
First of all, CableCheck notice sey di pipu for di right side of di bridge dey run towards di side wey bin dey collapse instead of away from di incident. No be so human beings dey do wen kasala bust.
Second, di SUV for di video just dey move go di spot of di collapse, and di part of di road wey di SUV bin dey go no show any cracks.
Di trees for both sides of di road no clear, and di time wey one of di bridge pillars fall go di right side of di road, e look like sey tree no dey di location.
More search show one Facebook page wey dey usually post AI videos. Di page bin post clearer version of di video on July 14.
Di page write sey “dem use AI make” di video
Dem use AI make di viral video.
