On Tuesday, some social media users claim sey protesters for Ibadan, di Oyo state capital, ask di Nigerian military to collect power from President Bola Tinubu.
For di one-minute video, one pickup truck wey cari some soldiers dey move slowly for road as some pipu dey protest for front.
One man voice come dey shout: “Tinubu must go. We want make di Nigerian army take over. I no know why dem dey fear.”
Dem share di video wella for Facebook, Twitter, and WhatsApp.
One X user, @SabinaNkiru, wit ova 11,000 followers, post di video come write sey: “Protesters for Ibadan block Nigerian Army vehicles, dey ask dem why dem dey fear to collect govment from Tinubu”.
Di post, saved here, don gada pass 1,700 views and 18 requotes.
Anoda X user, @PrinceUjay, wit ova 45,000 followers, post di same video wit di caption: “Situation dey hot for Ibadan as Protesters block Nigerian Army Vehicles dey tell dem sey make dem take ova di govment, sey di suffering under President Tinubu don pass power.”
Di post don gada pass 2,000 views wit 27 requotes. Saved here.
Oda versions of di post dey saved for here and here.
WETIN WE CHECK
A close look at di video show sey na from one TikTok user @mikkyforlife0 e comot.
Searches ontop di TikTok page of di user show sey dem bin releade di video on August 2, 2024, during di nationwide #EndBadGovernance protest.
Di protest against du economic hardship bin hapun for many parts of di kontri between August 1 and 10, 2024.
Also, one campaign banner of Asue Ighodalo, Edo governorship candidate of di Peoples Democratic Party (PDP), bin sidan ontop one advertising board for road.
Di protesters bin march past di two-lane road in front of TotalEnergies lorry park filling station for Benin City.
Di filling station dey along Upper Mission Road, Benin, di Edo state capital.
FINAL TOK
Di claim wey tok sey protesters for Ibadan ask di Nigerian army to collect power from di democratic government no correct as di video bin hapun for Benin during di August nationwide protest.
