Ìròyìn lati inú fídíò Facebook kan sọ pé Nàìjíríà fi àwọn ọmọ ogun ránṣẹ́ sí orílẹ̀ èdè Ísírẹ́lì kí rògbòdìyàn lè lọ sílẹ̀ níbẹ̀.
Fídíò kan tí àwọn ènìyàn ń pín kiri lórí Facebook, ohun ìgbàlódé Ibaraẹnisọrẹ orí ayélujára, sọ pé Nàìjíríà ti fi àwọn ọmọ ogun ránṣẹ́ sí Ísírẹ́lì (Israel) láti da wàhálà tó ń ṣẹlẹ̀ níbẹ̀ dúró.
Ọkùnrin agbóhùnsáfẹ́fẹ́ kan tó ń ròyìn fún ibùdó kan tí wọ́n pè ní TBC News ló sọ bẹ́ẹ̀ nínú fídíò kan tí ó dín díẹ̀ ní ìṣẹ́jú kan.
Ohùn kan tó fihàn pé ọmọ ogun kan ń sọ̀rọ̀ sọ pé: “Nàìjíríà dúpẹ́ lọ́wọ́ pípàṣẹ ìdánilẹ́kọ̀ọ́ ààbò ìlú sí àwọn alájọṣepọ̀ tó ṣe pàtàkì lágbàáyé.”
“Èyí jẹ́ ìrìn àjò ọ̀rẹ́ kii ṣe ogun.
“Àwọn ọmọ ogun náà yóò kópa nínú ètò ìṣọ̀kan tí wọ́n ṣe láti mú ìfọwọ́sowọ́pọ̀ àgbáyé àti ìṣọ̀kan láàárín àwọn orílẹ̀-èdè gbòòrò.”
Agbóhùnsáfẹ́fẹ́ náà sọ pé àwọn olùṣọ́ àgbáyé yìn ètò yìí, wọ́n sì pè é ní àmì ìdarí Áfíríkà nínú ìfọwọ́sowọ́pọ̀ ààbò àgbáyé.
Agbóhùnsáfẹ́fẹ́ náà fi ọ̀rọ̀ náà síta ní ọjọ́ ìṣẹ́gun, ọjọ́ kẹtàdínlógún, oṣù kẹfà, ọdún 2025.
Ní àkókò ìròyìn yìí, fídíò náà ti ní àwọn ènìyàn ẹgbẹ̀rún mẹta àti igba tí wọ́n fẹ́ràn ọ̀rọ̀ yìí, àwọn ènìyàn ẹẹdẹgbẹta àti mẹ́fà ló pín in, àwọn ènìyàn irínwó àti àádọ́rin ó dín marun-un ló sọ̀rọ̀ nípa ọ̀rọ̀ yìí.
Fídíò náà jáde ní àkókò kan tí ìjà láàárín Ísírẹ́lì àti orílẹ̀ èdè Iran ti gbòòrò, tí ogun náà sì ti wọ ọ̀sẹ̀ kejì.
Àwọn orílẹ̀-èdè, títí kan Nàìjíríà, àti àwọn adarí àgbáyé ti fi ìbẹ̀rù hàn, wọ́n sì rọ̀ àwọn orílẹ̀ èdè yìí láti dá ọwọ rògbòdìyàn yìí dúró.
Ṣùgbọ́n, ṣé Nàìjíríà dá sí ọ̀rọ̀ náà nípa rírán àwọn ọmọ ogun sí Ísírẹ́lì láti dá rògbòdìyàn yìí dúró?
AYẸWO Ọ̀RỌ̀ YÌÍ TÍ CABLECHECK SE RÈÉ
CableCheck ṣe ìwádìí ọ̀rọ̀ yìí nípa ṣíṣe àyẹ̀wò àwọn kókó ọ̀rọ̀ inú ọ̀rọ̀ yìí, a kò sì rí ìròyìn kankan tó fìdí rẹ̀ múlẹ̀.
Àwọn aláṣẹ fún eto ìjọba àpapọ̀ (the Presidency), àwọn elétò ààbò (Defense Headquarters-DHQ and Ministry of Defense) kò fi ọ̀rọ kankan síta nípa ọ̀rọ̀ yìí.
CableCheck kan sí Edward Buba, agbẹnusọ fun DHQ, fún ìdánilójú, ṣùgbọ́n Buba kò dáhùn.
Kò sí àwọn ilé-iṣẹ́ ìròyìn tó ṣeé gbẹ́kẹ̀ lé kankan tó gbé ìròyìn nípa ọ̀rọ̀ náà.
CableCheck tún ṣàkíyèsí àwọn àṣìṣe, tó jọ àwọn tí ìmọ̀-ẹ̀rọ atọ́wọ́dá (Artificial Intelligence-AI) ń fa, nínú ìfarahàn agbóhùnsáfẹ́fẹ́ náà.
Ní ìgbà díẹ̀ àkọ́kọ́ ti fídíò náà bẹ̀rẹ̀, a rí agbóhùnsáfẹ́fẹ́ náà tí ó wọ aṣọ búlúù, ẹni yìí sì pá lórí. A rí ẹni yiii nínú aṣọ búlúù dúdú, ààlà pupa, ó sì ní irun púpọ̀.
Ẹni yìí ń sọ̀rọ̀ pẹ̀lú ohùn tó yára, kò sì sọ̀rọ̀ gbe ẹni kan, ó sì ń pe ọ̀rọ̀ bíi ẹ̀rọ agbelẹrọ tí ó dàbí ti robọti (robot), gbogbo ọ̀rọ̀ yìí jọ ohun tí AI yí padà.
Ní ogunjọ, oṣù kẹfà, ọdún 2025, àwọn elétò ààbò ní Nàìjíríà, fi àwọn ọmọ ogun bíi igba ó dín mẹ́ta ránṣẹ́ sí ECOWAS Mission ní orílẹ̀ èdè Gambia (ECOMIG).
BI CABLECHECK SE RI Ọ̀RỌ̀ YÌÍ SÍ
Kò sí ẹ̀rí tó ṣeé gbẹ́kẹ̀ lé kankan tó fi hàn pé Nàìjíríà ti fi àwọn ọmọ ogun ránṣẹ́ sí Ísírẹ́lì láti dá rògbòdìyàn tó ń ṣẹlẹ̀ níbẹ̀ dúró.
