One video wey dem share for social media claim sey protesters burn Nyanya police station during di August 1 demonstration.
Di 43-second video, wey doh go viral since, show as some young boys bin dey destroy properties for one checkpoint ontop di busy Abuja-Keffi expressway.
One voice for di video claim sey angry youths wey dey protest di economic hardship for di kontri burn di Nyanya police station, wey dey outskirts of Abuja.
Di video wey one one Okezie Atani post for X via im verified handle, @Onsogbu, don gada pass 18,000 views, 151 likes and 115 reposts.
Dem also post di video for Facebook and e folo enta WhatsApp.
DI #ENDBADGOVERNANCE PROTEST
On Thursday, youths across Nigeria bin enta streets to protest food inflation, increase for petrol price, insecurity and high governance costs, among oda issues.
Di federal govment bin appeal to di protest organisers sey make dem pack di planned demonstrations go one side, and sey make dem dey patient.
Di police bin also ask di protesters to identify themselves to prevent thugs wey wan hijack di planned action.
For Abuja, dem tok sey make di protest only hapun for MKO Abiola Stadium — but some anti-government protesters wey gada around around Eagle Square, Unity Fountain and oda location no gree.
HOW WE CHECK DI CLAIM
To check weda dem burn Nyanya police station true true, TheCable cari small eye look Google Maps and Google Earth.
Google Maps show sey di Nyanya police station na 2.1km — about five minutes drive — from di checkpoint where di incident hapun.
Google Earth on di other hand show sey no police station dey di reported location.
Google Map photo showing the distance between Nyanya police station and the checkpointGoogle Earth image: There’s no police station in the vicinity
TheCable bin folo contact Josephine Adeh, FCT police spokesperson, wey tok sey protesters bin no burn di police station.
Di FCT police command tok sey di na di “traffic control container compartment” for di Nyanya checkpoint wey dem bin burn.
“Contrary to di tori wey bin dey travel sey violent protesters burn di Nyanya division, di FCT police command wan clarify sey no be di police division wey dem burn instead na di police container compartment for Nyanya checkpoint wey dem burn,” na so di statement tok.
“Some four (4) suspects bin try destroy di Tipper garage Police post, Mathias Jude 29 ‘m’ of Nyanya Area D, Mohammad Ahmed (23), Abba Jibril (18) and Mohammad Haruna (18), wey police don arrest.”
FINAL TOK
Di claim wey tok sey na di Nyanya police station wey protesters burn no correct. Di hoodlums bin only destroy di police container compartment for traffic controllers ontop checkpoint for Nyanya.
