One Facebook user claim sey Pope Leo XVI and oda bishops join mouth beg President Bola Tinubu to release Nnamdi Kalu, di detained leader of di proscribed Indigenous People of Biafra (IPOB), from jail.
@NgoziCommedy wey post di claim folo post video wey show as Tinubu dey yarn wit some bishops.
Di two-minute, 29-second video don gada 5.9k views, 60 reactions, 13 comments, and 16 shares.
“Pope Leo XVI and oda bishops in Rome beg President Bola Ahmed Tinubu to release Nnamdi Kanu make peace come back south east,” na so di post tok.
Anoda account folo post di same claim, @United Nations Mission for Referendum in Biafra Land, wey claim sey Pope Leo beg di Nigerian federal govment to release Nnamdi Kanu for di sake of peace for Nigeria and across Africa.
Kanu bin first chop arrest in 2015 ontop charges of treason but im later collect bail in 2017.
Im run comot for di kontri shortly after, but dem later re-arrest am in 2021 under some funny circumstances.
Im prolonged time for cell don spark legal battles, as many pipu dey call for im release.
WETIN WE CHECK
CableCheck analyse di frames from di video using Google Lens and we discova sey dem shoot am during Pope Leo inauguration.
The event on May 8 hapun as Pope Francis die on April 21 after long sickness.
President Tinubu bin dey among several world leaders and dignitaries wey attend di inauguration.
On di sidelines of di ceremony, Tinubu meet wit some bishops wey bin dey part of di Nigerian delegation to di Vatican.
For di original video, di bishops dey thank di president for di arrangement wey im make for dia sake to visit Vatican and for im time to attend di event in person.
Di pope bin no dey room di time wey Tinubu meet wit di bishops, and dem no request Nnamdi Kanu release at any time.
We also observe sey di users wey post di claims na pro-Biafra accounts.
Also, no confam media platform report di news.
FINAL TOK
Di claim wey tok sey Pope Leo XVI and oda bishops beg Tinubu to release Nnamdi Kanu no correct.
