On Tuesday, one report wey claim sey former President Goodluck Jonathan predict President Bola Tinubu victory for di 2027 presidential election begin waka for internet.
Di headline of di report tok sey, “Tinubu go win 2027 presidential election – Goodluck Jonathan.”
Daily Post bin allegedly publish di report on April 15, 2025.
Di report also waka ontop different Facebook pages wey get plenti followings and e don folo gada beta engagement for TikTok.
You fit also find am here and here.
WETIN WE CHECK
Daily Post, di newspaper wey dem mention for di viral image, no published dat kain article. Searches for dia official website and old papers no comot any results relating to wetin Jonathan allegedly predict.
Additionally, di image dey different from di original foto size and style wey Daily Post dey use, which mean sey na photoshopped.
Also, no confam news outlet report sey Jonathan tok dat kain tin.
CableCheck folo Jonathan media team tok to confam di authenticity of di report. Ikechukwu Eze, special assistant to di former president, debunk di claim.
Eze tok sey di tori na “fake news wey agents of disinformation cook”.
“E no get any time wey Dr. Jonathan folo any journalist tok sake of di forthcoming 2027 elections,” na so im tok.
FINAK TOK
Di claim wey tok sey Jonathan predict Tinubu victory for di 2027 presidential election no correct.
