Adesanmi Akinsulore, one professor and consultant psychiatrist for Awolowo University and di Obafemi Awolowo University Teaching Hospital, Ile-Ife, tok sey Nigeria na nomba six among all di kontris for di world wit di highest suicide rates.
According to PUNCH, Akinsulore make di claim during lecture for one event wey The Still Waters Mental Health Foundation organise for Ladoke Akintola University of Technology Ogbomoso, Oyo state.
Im tok sey urgent need dey for collaborative efforts to address di issue, especially among students.
“One suicide dey hapun for every 25 attempts. In 2021, na suicide be di third leading cause of death among 15 to 29-year-olds around di world,” na so dem quote im tok.
“To dey address dis wahala na evribodi work. We must work togeda to create supportive and inclusive environment wey promote student well-being and resilience.”
WETIN HAPUN BEFORE
According to di World Health Organisation (WHO), suicide dey kpai more dan 700,000 people evri year wit an estimated 20 suicide attempts for each suicide.
Di organisation tok sey suicide na di fourth leading cause of death among 15–29-year-olds (for both sexes) globally, sey 73 percent of all suicides hapun for low- and middle-income countries.
Di risk factors wey fit cause suicide include depression, alcohol use disorders, loss, loneliness, discrimination, relationship disputes, financial problems, chronic pain and illness, violence, abuse, and conflict or oda humanitarian emergencies.
Even for Nigeria, reports of suicide don comot recently.
In October, Omolayo Bamidele, one 58-year-old man, reportedly commit suicide for Igburowo town, Odigbo LGA of Ondo.
Residents of di community tok sey dem find Bamidele bodi for dusty road wit bottle of chemical substance wey dem suspect to be “Sniper” beside am.
In September, Gabriel Magaji, one 38-year-old resident of Masaka for Karu LGA of Nasarawa, commit suicide sake of alleged infidelity by im wife.
NIGERIA NA DI SIXTH KONTRI FOR DI WORLD WIT HIGHEST SUICIDE RATES?
TheCable folo Akinsulore tok but im no gree share di place where im see di informate wey im use make di claim.
Howeva, di CableCheck discover sey according to WHO informate on suicide mortality rate wey di organisation last update on January 8, 2024, Nigeria bin rank 157th for di list wit 3.5 suicides per 100,000 people.
Di top 10 kontris by ranking na Lesotho (72.4 suicides per 100,000 pipu), Guyana (40.3 suicides per 100,000 pipu), Eswatini (29.4 suicides per 100,000 pipu), Republic of Korea (28.6 suicides per 100,000 pipu), Kiribati (28.3 suicides per 100,000 pipu), and Micronesia (28.2 suicides per 100,000 pipu).
Odas na Lithuania (26.1 suicides per 100,000 pipu), Suriname (25.4 suicides per 100,000 pipu), Russian Federation (25.1 suicides per 100,000 pipu), and South Africa (23.5 suicides per 100,000 pipu).
Dis informate show sey na Micronesia be di sixth kontri for di world wit di highest suicide rates.
FINAL TOK
Nigeria no be di sixth kontri for di world wit di highest suicide rates.
