Ụfọdụ ozi na soshal mịdia ekwuola na Netflix wepuru ihe nkiri ndị Toyin Abraham, onye na-eme ihe ejije na Naijiria, mepụtara.
N’ụbọchị iri nke ọnwa Julaị, @KadunaResident, otu onye ji X ebipụta ozi, kwuru na Netflix ewepụla ihe nkiri Abraham n’asafe ha.
“OZI MGBEREDE: A nụrụ m na Netflix ewepụla ihe nkiri niile nke Toyin Abraham nwe? Biko, were nụ okwu ya nwayọ maka na ọ bụ nne mmadụ,” onye a ji X ebipụta ozi dere.
Ozi a enwetala nkiri karịrị narị puku isii na iri atọ n’isii (636,000), nkwenye pụku anọ na narị abụọ 4,200 likes, na nkesa narị asatọ n’asatọ (808).
E kesakwara ozi a ebe a n’ebe a
ḾGBÁRÌ ÁKỤ́KỌ́
Abraham bụ otu n’ime ndị a ma-ama na Naijiria akọtọrọ maka ńkwàdó hà kwàdòrò onye isiala Bola Tinubu na ntuliaka afọ 2023.
E kwuru na nya bụ onye na-eme ihe ejije kpọchiri otu onye a kpọrọ Big Ayo, onye na-akwalite ahịa ndị mmadụ (influencer), n’ụlọ nga.
“Oriaku @toyin_abraham1, ndụ gị emebiela! Ị narara Tinubu ego ka ị were rụgharịa isi nkwọcha di gi. Onye iberibe,” ozi a ewetugoro kwuru.
N’ihe onyonyo Instagram Live nke o mere n’ụbọchị Wenezde, Abraham gọnayiri nya bụ okwu, ma sị na onweghị mgbe ọ sịrị ka ndị uwe ojii kpọchie nne Ayo. Kama ihe ọ mere bụ ikpesa nya bụ okwu na cybercrime unit nke ndị uwe ojii.
Abraham kwuru na ọ gaghị anabata mkparị ọbụla nke metụtara ụmụ ya, ma ṅụọ iyi imegide ndị niile na-emekpa ya ahụ na soshal mịdia.
Okwu ya kpasuru ọtụtụ ndị mmadụ na X iwe, nke mere ka ụfọdụ degaara Netflix na Prime Video akwụkwọ ka ha wetuo ihe nkiri niile nke Toyin nwe maka “iji ike eme ihe n’ụzọ n’ezighi ezi”.
Otu onye kesara ozi ahụ nke o degaara Netflix, ma gwa ndị ọzọ ka ha mee dịka o mere. Ụfọdụ kwuru na ha ga-enye mkpesa ka ewetuo asafe soshal midia ya, ma ọ bụrụ na ọ kpọpụtaghị Big Ayo na nga.
ŃNYÒCHÁ ÓKWU
Inyocha okwu a, TheCable nere anya na Netflix ịmata ma ewetuola ihe nkiri ndị Abraham nwe.
Nnyocha a chọpụtara na ihe nkiri ndị Abraham nwe dịka ‘Ijakumo’, ‘Malaika’, ‘Prophetess’, ‘Elevator Baby’, na ọtụtụ ndị ọzọ ka nọ na Netflix.
ŃCHỊ́KỌ́TÁ
Netflix éwepụ̀bèghị̀ ihe nkiri Abraham n’asafe ha.
