On January 28, Chinonso Egemba, di Nigerian medical expert aka Aproko Doctor, claim sey Nigeria get di second-highest nomba of pipu wey dey live wit human immunodeficiency virus (HIV) for di world.
Aproko Doctor share di claim for im X handle, wey get like 2.3 million followers.
Im bin dey chuk mouth for US President Donald Trump executive decision to cancel moni for HIV treatment for kontris wey still dey develop.
As Trump give di executive order, di US Department of State suspend di moni wey dem bin dey give from di president’s emergency plan for AIDS relief (PEPFAR).
According to di World Health Organisation (WHO), PEPFAR dey provide HIV treatment for more dan 20 million pipu wey dey live wit di disease for di world, including 566,000 children under 15 years of age.
For di post, di medical influencer bin dey explain how di money wey US govment cancel to treat HIV go affect how antiretroviral drugs go dey available.
Wen dem challenge Aproko Doctor about di source of im informate, im share screenshot of report from di United Nations Children’s Fund (UNICEF) website.
“Nigeria get di second highest nomba of pipu wey dey live wit HIV for di world,” na so Aproko Doctor write.
For di article wey dem publish in 2018, UNICEF tok sey Nigeria get 190,950 HIV/AIDS infections per year – di second highest rate for di world. Di global bodi tok sey Nigeria get di world’s second-highest burden of HIV/AIDS, wit an estimated three million people wey dey live wit HIV. Di article show sey di informate wey UNICEF quote na since 2015.
E dey necessary to understand sey di burden of di virus dey different from di informate of pipu wey dey live wit am. Di HIV burden na di overall impact of di virus, including di nomba of pipu wey dey live wit di virus, di rate of new infections, and di deaths caused by di virus, among odas.
WETIN WE CHECK
To confam di mata, CableCheck look di WHO’s HIV country intelligence dashboard. As of 2023, di dashboard show informate about pipu wey dey live wit HIV for at least 134 countries.
Di informate show sey South Africa get di highest nomba of pipu wey dey live wit HIV, wit 7.7 million individuals, followed by India at 2.5 million, Mozambique wit 2.4 million, and Nigeria as nomba four wit 2 million.
| Country | Number of Persons Living With HIV |
| South African | 7,700,000 |
| India | 2,500,000 |
| Mozambique | 2,400,000 |
| Nigeria | 2,000,000 |
| United Republic of Tanzania | 1,700,000 |
| Uganda | 1,500,000 |
| Kenya | 1,400,000 |
| Zambia | 1,300,000 |
| Zimbabwe | 1,300,000 |
| Brazil | 1,000,000 |
Table wey show di top 10 kontris wit di highest nomba of pipu wey dey live wit HIV. Informate: WHO
Dis informare mean sey Nigeria get di fourth-highest nomba of pipu wey dey live wit HIV globally and di third-highest for Africa.
For report wey di WHO released in July 2024, approximately 39.9 million people bin dey live wit HIV at di end of 2023. Di report no give di breakdown of informate for each kontri. Howeva, an estimated 26 million pipu wey dey live wit di virus dey Africa.
FINAL TOK
Di claim wey tok sey Nigeria get di second-highest nomba of pipu wey dey live wit HIV for di world no correct. Recent informate from di WHO show anoda tin.
