One social media user don claim sey United States President Donald Trump plan to deport 3.7 million Nigerians.
Di claim, wey dem make on Monday — di same day wey Trump enta office — tok sey di deportations go hapun on Tuesday.
“My goat Donald Trump dey deport all these pipu tomoro see who be nomba 1 for di list,” @Zaddy_Bruh, di X user wey get Russian flag next to im username, tweet give im followers.
Nigeria sidon ontop di eight-kontri list wit 3.7 million pipu wey dem allegedly suppose deport; next na Zimbabwe wit 765,000, Ghana wit 1.2 million, Mozambique wit 123,000, and Bangladesh wit 1.9 million.
Oda kontris wey dey di list na Brazil wit 6.9 million, di Democratic Republic of Congo (DRC) with 2.1 million, and Mexico with 17.8 million.
Dem bin no list di kontris according to di one wey get di biggest nomba but na Nigeria di pesin first call.
So far, di tweet don gada pass 2.7 million views, 16,000 likes, 2000 retweets, 1400 bookmarks, and 1300 comments wey dey mostly express fear about di alleged planned action.
WETIN WE CHECK
Before im win di presidential election in November, Trump tok sey controlling immigration go be one of im main actions.
Most of di time, di US president dey describe illegal immigrants as animals wey dey increase crime rates for di US.
During im inauguration, im announce some executive orders wey im go immediately implement on im first day for office.
One of these actions na national emergency wey im declare for di US-Mexico border and action wey require army to go tighten security for border.
“All illegal entry go immediately stop. And we go begin di process of returning millions and millions of criminal animals back to di places wey dem come from,” na so Trump tok.
Di president also tok sey im administration restore di “Remain in Mexico” programme, wey require pipu wey dey seek refuge for US to wait for Mexico as dem dey process dia papers.
Trump no mention any oda kontri but im no hide im feelings toward illegal immigrants.
According to one 2024 Migration Policy Institute (MPI) report, nearly 46.2 million immigrants dey live for US.
Di report’s informate bin come from di US Census Bureau (using im 2022 American Community Survey [ACS], 2023 Current Population Survey [CPS], and 2000 decennial census) and di US Department of Homeland Security (DHS).
Di latest informate from di DHS show sey Mexicans account for 4.81 million in 2022, representing di largest illegal immigrant group.
Afta Mexico, di next largest illegal immigrant populations bin come from Guatemala, El Salvador, and Honduras.
Oda ontop di top 10 list bin include di Philippines, Venezuela, Colombia, Brazil, India, and China.
As of 2023, informate from di United States Census Bureau show sey di population of Nigerians for di kontri na 604,077.
Also, e dey important to note sey deportation from di US dey follow one long process wey no fit dey achievable in one day as di social media user claim.
Di US Immigration and Customs Enforcement (ICE) fit hold di foreign national for detention center before trial or deportation.
After dem detain di non-citizen, dem fit appear before judge for immigration court during di deportation process.
In addition, no US government statement don comot to confam di tweet wey claim sey dem go deport 3.7 million Nigerians. No correct US media outlet folo report di mata.
FINAL TOK
No evidence dey to support di claim sey Trump order di deportation of some kontri pipu from di US.
