Some social media posts claim sey Netflix don comot all di film produced by Toyin Abraham, di Nollywood actress, from dia platform.
On July 10, @KadunaResident, one X user, claim sey di streaming platform don comot all di film wey Abraham dey inside.
“BREAKING: I hear sey Netflix don delete all Toyin Abraham film today? Comrades, abeg lower your weapon. Na person mama,” na so di user write.
So far, di post don gada pass 636,000 views, 4,200 likes, and 808 reposts for X.
Dem also share di post here and here.
WETIN HAPUN BEFORE
Abraham na one of plenti celebrities wey don face quarrel for social media ontop sey she support President Bola Tinubu during di 2023 presidential elections.
Recently, dem drop accusation ontop di filmmaker head sey she cari police go arrest one social media influencer wey im name na Big Ayo and im mama sake of sey dem cari her name put for poto poto.
Ayo bin allege sey Abraham collect moni from Tinubu cari her husband Kolawole Ajeyemi go hospital make dem put hair ontop im bald head.
“Mrs @toyin_abraham1 walai aiye e ti ta! You collect Tinubu money use do hair transplant for your husband. Stoppid fool,” na so di post wey im don delete now bin tok.
For Instagram live session on Wednesday, di actress denied di claim, sey she no tell police make dem arrest Ayo mama but instead she report di case to di cybercrime unit.
Abraham tok sey she no go take any insult wey dem give her children and she vow sey she go take action against critics wey dey bully her for social media.
Howeva, her tok vex plenti Nigerian X users, as some begin dey write letter give streaming platforms like Netflix and Prime Video sey make dem comot her movies sake of alleged “abuse of power”.
One user bin share copy of im letter to Netflix and im urge others to do di same. Some threaten sey dem go report Abraham social media accounts if police no release Big Ayo.
WETIN WE CHECK
To comfam di social media claim, TheCable search Netflix to check weda di movies wey Abraham produced still dey di platform.
Di search find sey films wey get di actress, including ‘Ijakumo’, ‘Malaika’, ‘Prophetess’, ‘Elevator Baby’, and several more, still dey available for Netflix streaming.
FINAL TOK
Netflix neva comot Abraham films from dia platform.
