Abdullahi Sule, di govnor of Nasarawa, tok sey di state no take any loan since President Bola Tinubu enta office.
Sule make dis claim during town hall meeting wey Channels TV organise sake of di tax reform bills mata.
“I hear as pesin tok sey since President Tinubu enta office, govnors don dey get beta revenue, and dem wan sabi wetin di govnors dey do wit di revenues,” na so di govnor tok.
“Go di different states; you go tok wetin di govnors dey do wit di revenue.
“For Nasarawa state, I neva boro moni since President Tinubu enta office, but today, I fit boast of di 10,000 hectares of land wey I use for agriculture, all di equipment I don buy for agriculture, all di payments we don make… I fit dey tok dey go.”
WETIN WE CHECK
Tinubu enta office February and officially dey sworn in on May 29, 2023.
To confam Sule claim, TheCable check di domestic and external debt records of sub-nationals from di Debt Management Office (DMO) covering di time from di start of Tinubu administration to di present.
DOMESTIC DEBT
In June 2023, one month afta Tinubu enta office, di DMO show Nasarawa domestic debt as N71.11 billion.
By June 2024, dis nomba drop go N23.94 billion.
Dis show 66 percent reduction for di state domestic debt since di president enta office.
EXTERNAL DEBT
Review of Nasarawa external debt informate from DMO show sey e tanda at $52.33 million in June 2023.
By June 2024, e increase small to $52.36 million.
Dis show growth of less dan one percent since Tinubu enta office.
FINAL TOK
Di claim wey Sule make sey im administration neva boro since Tinubu enta office dey largely correct, according to available data from the DMO.
