Vincent Olatunji, onye kọmishọna na-ahụ maka ụlọọrụ nchekwa ozi a kpọrọ Nigeria Data Protection Commission (NDPC), kwuru na ngalaba Information and Communication Technology (ICT) bụ ya na-ewebatakarị ego kachasị na mmụba akụ n’ụba Naijiria nke a na-akpọ gross domestic product (GDP).
Ọ sị na ICT ewetala pasentị iri n’isii ruo ịrị n’asaa kámgbè afọ anọ maọbụ ise gara-aga.
Olatunji kwuru nke a n’ụbọchị Tuesday n’ihe omume Arise TV a kpọrọ Prime Time programme.
“N’ọnwa anọ ruo ise gara-aga ngalaba ICT nwere mmụba ego nye akụ n’ụba Naijiria nọ n’etiti pasentị iri n’isii ruo iri n’asatọ (16-18%),” Olatunji kwuru.
“Ebum n’uche anyị n’afọ ole na-abia bụ ịhụ na ngalaba nka n’uzu ọgbara ọhụrụ webatara ihe ruru pasentị iri na abụọ na akụnụba Naijiria, ma i lee ya site n’akụnụba otu tari dollar ($1 trillion) nke Tinubu na-achụ.
“Ị ga-amazị ihe nke a ga-apụta m’ọbụrụ na ngalaba ndị ọzọ webata atụmatụ gbara ọkpụrụkpụ, ihe ga-abịa dị mma.”
ŃNYÒCHÁ
CableCheck nyochara ozi sị na n’ụlọọrụ n’edekọ ozi na Naijiria bụ National Bureau of Statistics (NBS) ebe e dekọrọ mmụba ego Naijiria bụ GDP kámgbè afọ 2021 ruo n’ọnwa Septemba 2024.
Ozị a gosịrị na n’afọ 2021, ngalaba na-ahụ maka ọrụ úgbo bụ ya webatakarịchara ego na akụnụba Naijiria, nke nwere pasentị iri abụọ n’ise n’ụma iri asatọ n’asatọ (25.88%). Ngalaba na-esonye ya bụ nke azụmahịa nke nwere pasentị iri na ise n’ụma iri isii n’itoolu (15.69%). Ngalaba ICT webatara pasentị iri n’ise na ụma iri ise n’otu (15.51%).
N’afọ 2022, ngalaba ọrụ úgbo nodosịrị n’ógó mbụ na ngalaba na-ewetakaricha ego na akụnụba Naijiria, nke nwere pasentị iri abụọ n’ise n’ụma iri ise n’asato (25.58%). Nke na-esonye ya bụ ngalaba ICT, nke nwere pasentị iri n’isii n’ụma iri ise n’abụọ (16.52%) na ngalaba azụmahịa nke nwere pasentị iri n’isii (16%).
N’afọ 2023, ngalaba ọrụ ubi webatara pasentị iri abụọ n’ise n’ụma iri n’asatọ (25.18%), sonyere ICT nke nwere pasentị ịrị n’asaa n’ụma iri atọ n’anọ (17.34%), ebe azụmahịa nwere pasentị ịrị n’ise n’uma ịrị asaato n’atọ (15.83%).
Ozi nke afọ 2024 aputabeghị, mana nke a hụrụ bụ nke sitere n’ọnwa January nke afọ ahụ ruo June n’otu afọ ahụ.
N’ọnwa atọ mbụ nke afọ 2024, ngalaba ọrụ ubi webatara pasentị iri abụọ n’otu n’ụma asatọ (21.08%), ngalaba ICT webatara pasentị iri n’asaa n’ụma iri asatọ n’asatọ (17.88), ebe ngalaba azụmahịa webatara pasentị iri isii n’ụma iri atọ n’itoolu (16.39%) nye akụnụba Naijiria.
Site n’ọnwa April ruo June nke afọ 2024, ngalaba ọrụ ubi webatara pasentị iri abụọ n’abụọ n’ụma iri isi n’otu (22.61%), ngalaba ICT nwetara pasentị iri itoolu n’uma asaa n’asaa (19.77%), ebe ngalaba azụmahịa webatara pasentị iri n’isii n’ụma iri atọ n’itoolu (16.39%).
N’ọnwa atọ ikpeazụ nke afọ ahụ, ngalaba ọrụ ubi webatara pasentị iri abụọ n’abụọ n’ụma iri isi n’ise (22.65%), ngalaba ICT webatara pasentị iri n’isii n’ụma iri atọ n’isii (16.36%), ebe ngalaba azụmahịa nwetara pasentị iri n’anọ n’ụma iri asaa n’asatọ (14.78%).
ḾKPÉBÌ
Site n’ozi ndị a, okwu na ngalaba ICT webatakarịchara ego kachasị na akụ n’ụba Naijiria bụ asị. Ngalaba ọrụ ubi bụ ya webatakarịchara ego na akụnụba Naijiria.
