One social media user don claim sey former President Olusegun Obasanjo chuk mouth for di political kasala wey dey hapun for Rivers state.
According to di claim, Obasanjo visit Fubara ask am sey make im close di state house of assembly and collect di security officers wey dey wit di assembly members.
Di post also claim sey Obasanjo advise Fubara sey make im order di closure of di Nigeria National Petroleum Company (NNPC) and di Niger-Delta Development Commission (NDDC) and to demolish any facility wey dem fit use plan im impeachment.
Di claim wey comot for X on Monday don gada 4.3k likes, 1.5k reposts, and 620 comments.
“OBJ DEY PARA — Close Rivers Assembly. Declare State of Emergency for Rivers State — Obasanjo Visit SIM Fubara,” na so di post tok.
“Collect all security officers from all Rivers Assembly members. Shut down NNPC, shut down NDDC, and scata any power wey wan challenge you.
“Na you bi govnor, wey di pipu elect. You bi di Chief Security Officer of Rivers State. Wetin you order naim go stand—no bi Tinubu or Wike put you for power. Demolish any hall or arena wey dem wan use plan your impeachment. Tinubu need Rivers votes to win di 2027 election, and you dey im road”
DI RIVERS POLITICAL CRISIS
Rivers state don dey inside political kasala sake of power struggle between Siminalayi Fubara and Nyesom Wike, di govnor before am, and minister of di federal capital territory (FCT).
On Monday, di kasala swell up afta state lawmakers begin impeachment procedure ontop Fubara and Ngozi Odu, im deputy, head “sake of gross misconduct”.
On February 28, di supreme court bin gree for one federal high court ruling wey ban di Central Bank of Nigeria (CBN) and di accountant-general of di federation from releasing di monthly moni wey.Rivers suppose collect.
Di court also cancel di local government elections wey di state conduct on October 5, 2024. Fubara promise sey im go obey wetin di court tok make im no bi like sey di state get strong head.
Di assembly shift plenary indefinitely, afta di governor write give di assembly for di second time, sey make dem set new date to hear d budget.
Howeva, different pipu don dey chuk mouth for di mata sey make peace return to di state.
WETIN WE CHECK
CableCheck contact Kehinde Akinyemi, media assistant to Obasanjo, wey tok sey di claim no correct.
Akinyemi tok sey di former president no visit Fubara and im no give am instruction to collect security from di lawmakers.
“As you sabi, Obasanjo no get social media account, and im no visit di governor or tok dat kain tok,” na so Akinyemi tok.
We also notice sey no confam media platform report di claim.
Di Rivers govement don also debunk di report, say na “plan to cause chaos and anarchy in the state”.
For statement wey comot on Tuesday, Nelson Chukwudi, Fubara chief informate, tok sey neither Obasanjo nor any special group visit di govnor sake of di crisis for di state.
Chukwudi add sey di govnor bin express im willingness to comply with di court ruling on di mata.
“Make evribodi sey sey no visit from PANDEF reach Governor Fubara side on di date wey dem claim, Chief Obasanjo sef no folo visit am as pipu wey hate us claim,” na so di statement tok.
FINAL TOK
Di claim wey tok sey Obasanjo visit Fubara, ask am to shut di state assembly and collect all security officers attached to di lawmakers no correct.
Di former president also no order di closure of NNPC and NDDC.
