Ótù ihe nkiri na TikTok ekwuola na e keputala steeti ọhụrụ na south-east nke Niajiria.
Ihe ngosị nkeji anọ a, n’asụsụ Igbo, e nwetala nkiri karịrị puku abụọ na iri ise n’asaa (2,057), nkesa puku atọ narị asaatọ n’iri asatọ n’itoolu (3,889).
Dịka ihe nkiri ahụ nke @marachi biputara kwuru, Naijiria nwere steeti iri atọ n’asaa.
Ọ gara n’ihu gụpụta steeti ndị nya bụ nkepụta metụtara.
“Ụnu ọ mụkwa anya? Ozi a maka ịkepụta steeti ọhụrụ nke na-ekwu n’anyi nwe ziri steeti iri atọ n’asaa n’abụghị iri atọ n’isii tinyere isi ala bụ Abuja.
“Nya bụ na e keputala steeti ọhụrụ, Maka ndị n’aghọtaghị oyibo ka m sụọ ya na Igbo, e kepụta steeti ọhụrụ,” o kwuru.
“E keputala ya site n’ufọdụ akụkụ Abia, Imo na Anambra steeti.
“Ọ bụrụ n’ịbu onye Anambra, lee anya n’akụkụ gị ka ị mata ma obodo gị o so ná steeti ọhụrụ a.
“Obodo ndị dịka Ihiala, Uli, Ọzụbụlụ, Akokwa, Ụmụchụ, Ụmụnze, Ụmụakụ, Nwangele, Nkwere, New Ideato North, Nwabosi West, Alaọma, Owerrebiri, Oguta, Isu, Arọndịzuogụ, Ideatọ north, Ideatọ south, Njaba, Oru east, Orsu.”
E kesakwala nya bu ihe nkiri na X nakwa Facebook.
MÀNÀ È KÉPỤ̀TÁLÁ STÉÈTÌ ORLU NÀ SOUTH-EAST?
N’ụbọchị ise nke ọnwa June, atụmatụ ịwụ na-achọ nkwado nke nkepụta steeti ọhụrụ na mpaghara ọwụwa anyanwụ nke Niajiria, gafere ngụpụta nke mbụ n’ụlọ omeiwu bụ house of representatives.
Iwu a, nke Ikenga Ugochinyere, onye na-anọchite anya ndị Ideato north na south n’ụlọ ome ịwụ Niajiria, chọrọ ka e kepụta steeti ọhụrụ na mpaghara ahụ.
A ga-ekeputa nya bụ steeti site na steeti Imo, Anambra, na Abia dịka iwu a depụtara.
N’ime mpaghara isii e nwere na Niajiria, south-east nwere naanị steeti ise, mpaghara ndị ọzọ nwere steeti isii, ebe mpaghara north-west nwere steeti asaa.
Dịka obodo nwere ụlọ omeiwu abụọ nke ndị oyibo kpọrọ bi-cameral legislature, atụmatụ ọbụla chọrọ ime ka ọ buru iwu ga-agafe ụlọ omeiwu abụọ ndị a.
Nya bụ atụmatụ iwu ga-agafe ngụpụta atọ n’ụlọ omeiwu abụọ a, nya na ntụnye ọnụ ndị Niajiria chere na iwu ahụ metụtara ha.
Ka ụlọ omeiwu abụọ ndị a nabatachara iwu ahụ, a ga-ewegazi ya ka onye isi ala bịanye aka ná nkwado nya bụ iwu.
ŃCHỊ́KỌ́TÁ
Okwu na e keputala steeti ọhụrụ na south-east bụ asị.
Atụmatụ iwu a bụ naanị ngụpụta nke mbụ ka ọ gafebere n’ụlọ omeiwu — nke bụ usoro mbụ atụmatụ ọbụla na-agafe tupu a nabata ya dịka iwu.
