Some posts for social media don suggest sey one of di flags behind President Bola Tinubu during im national address last Sunday na Russia own.
For televised broadcast, Tinubu tok about di nationwide #EndBadGovernance protest and im call for suspension of di demonstrations, sey make protesters give chance for negotiation.
Tinubu tok sey pipu wey dey take advantage of di protests to cause wahala go enta problem, sey chance no dey for ethnic bigotry for di kontri.
Di president tok wella about im achievements for office, defend im policies, and stress ontop di mata sey di decisions wey im take dey necessary for di economic revival and survival of di kontri.
Two flags bin dey behind di president — one wey cari di national colours and anoda wit different sign.
“Why Russian flag tanda next to di Nigerian flag? Tinubu dey Russia abi wetin???” na so one X user tweet.
Some comments under one post wey dey ask Nigerians to identify di second flag also tok sey e belong to Russia, wit several social media users wey dey show fear.
Di panic come as some protesters dey wave Russian flags during di protests.
Di flags bin first comot for Kano on di first day of di protest and e don enta Jos, Plateau capital, and di federal capital territory (FCT).
Di protesters bin dey call for Russian President Vladimir Putin intervention for Nigeria, sey Tinubu dey dance to di music of im “masters” — di Western kontris.
WHICH FLAG BIN DEY BESIDE TINUBU?
Di second flag beside di national flag cari four colours — red, blue, white, and green. Na di colours of di presidential standard of Nigeria.
Di four-band flag wey belong to di Nigerian armed forces mean sey Tinubu na di commander-in-chief as well as di president.
E no suppose dey confused with di Russian flag wey get three colours — white, blue, and red.
