One X user, @xagreat, don claim sey Kaduna state neva attract one single foreign direct investment (FDI) since Nasir el-Rufai, di forma govnor, comot office.
Di X user also tok sey by 2027, during di next election, dem go comot Uba Sani, di state govnor, to save Kaduna from “sinking.”
“Since Elrufai comot office, Kaduna state neva cari eye see one single Foreign Direct Investment. Na wetin dem dey call backwardness be dis,” na so di post tok.
“We go retire Uba Sani for 2027 to rescue Kaduna from any more sinking.”
Di post don attract ova 14,000 views, 232 likes, and 78 reposts as of March 4.
WHY FDI DEY IMPORTANT?
FDI na investment from one party for one kontri inside business or corporation for anoda kontri to establish lasting interest.
Di tin na major economic driver wey dey create employment opportunities, grow businesses, increases tax revenue, develop kontri,, and increase di kontri external reserves.
Also, foreign direct investment dey serve as economic performance indicator, as states wey no attract FDI come be like sey dem no enter investor eye.
WETIN WE CHECK
Dem swear Sani in as Kaduna govnor on May 29, 2023.
CableCheck review di capital importation from di National Bureau of Statistics (NBS) from di third quarter (Q3) of 2023 through di third quarter of 2024.
Di informate show sey Kaduna no get FDI between Q3 of 2023 and di second quarter (Q2) of 2024.
For di last capital importation informate of 2024, NBS report sey Kaduna attract $1.95 million for investments in Q3 2024.
NBS tok sey Kaduna bin dey among di five states wey record capital importation during di quarter, with di $1.95 million wey represent 0.16 percent of di total FDI of $1.25 billion wey Nigeria bin record within Q3 2024.
FINAL TOK
Di claim wey tok sey Kaduna neva attract FDI since el-Rufai comot office no correct.
