One video wey show as Aliko Dangote, chairman of di Dangote Group, tok sey im launch investment scheme “to help Nigerians grow dia moni” dey trend for internet.
For di two-minute video, Dangote dey allegedly endorse di investment programme — without name, and im dey beg Nigerians above 30 years to invest for di programme.
Dem write for di video “My financial project for di Nigerian pipu”.
“Dis year, you fit participate for official programme wey go help Nigerians secure and grow dia moni. Thousands of families across di kontri don already dey see di difference wey dis initiative fit make,” na so Dangote allegedl tok.
“Make I dey clear, if you join dis programme today you fit collect N2.66 million in just di first week. No be dream, na real, confam and supported by system wey dem design for your success.
“Na so e dey work: you go drop minimum investment of N380,000 and you go start to dey collect moni evriday automatically.”
WETIN WE CHECK
CableCheck observe sey no beta newspaper report di alleged launch of di investment programme, wey for be major news story if to sey e correct.
Anoda check show sey dem edit di video make e be like sey Dangote bin dey tok about di investment scheme.
Observation of di mouth area be like cut and join.
Analysis of key frames from di video show sey dem get di video from interview wey Dangote grant on October 28 for di Future Investment Initiative for Riyadh, Saudi Arabia.
Dangote bin wear di same cloth, and di backdrop match. Dem change Dangote speech for di viral video and e no align wit wetin im tok for di original footage, meaning sey dem touch di video.
On Anthony Chiejina, di Dangote Group chief informate, chuk mouth for di mata and im criticise di video.
Chiejina deny sey Dangote make di statements for video, sey: “Na deep fake.”
