Afta bandits attack worshippers Christ Apostolic Church (CAC) branch for Oke Isegun inside di Eruku community for Kwara state on November 18, different foto wey show as Christians allegedly cari gun as self-defence begin waka for social media
Dem capture di attack for live stream, and e later comot for social media.
Three worshippers bin die, togeda wit 38 others wey dem kidnap during di attack.
Di bandits’ attack for di church hapun as pipu dey tok about Christian genocide for Nigeria and di threat of military action wey United States President Donald Trump give.
Since den, attack ontop churches for di kontri don increase, togeda wit some kain tok sey development citizens suppose dey cari weapon to defend themselves from gunmen.
As di attacks dey hapun, social media users begin dey post pictures wey allegedly show as Christians dey cari gun.
FOTO WEY COME FROM SKIT DEY MISREPRESENTED AS REAL EVENT
On December 1, Oriental Times, one blogsite, post foto wey show as one man hold AK-47 rifle and Bible beside one woman.
Dem write for di foto sey: “Nigerian Pastor Dey Preach With AK-47 For Street”.
Di post don gada pass 4,500 likes, 880 comments, and 230 shares.
Using Google Lens to conduct reverse image search, CableCheck discover sey dem screenshot di foto from one video by one Nigerian content creator, aka Pastor Destiny.
Di content creator bin post di video for im Facebook page — REAL DON DADDY — on November 24, wey show as he tanda for road wit one woman dey preach for street as im hold Bible and AK-47 gun.
Di content creator dey make content wey dey mix prayer, preaching, and comedy.
AI FOTO OF WORSHIPPERS WEY DEY CARI GUN
Anoda viral foto show as some churchgoers with AK-47 gun tanda for church. Di foto don waka for social media. Some of di pipu wey post am claim sey di church dey Kwara.
On November 23, one X user wey get handle @BLEXGUY post di viral foto come write: “Happy Sunday from church for kwara guide yourself….. No wait for security”.
Di post don gada pass one million views with ova 2,000 reposts, 309 quotes, and 19,000 likes.
Close inspection of di viral foto show signs of AI.
First, di woman wey tanda for di centre of di foto dey hold AK-47 get four fingers for her right hand.
Second, wen we check di foto for SynthID, one tool wey dey watermark and identify AI-generated content, e show sey dem create di foto wit Google AI.
Anoda viral foto of one woman wey hold gun togeda wit Bible as she wear security jacket comot for Facebook as dem write “One hand wit bible other hand wit gun scriptures fulfill NEHEMIAH 4:3-17 Father protect all believers in Jesus Name ABEG PRAY FOR BELIEVERS”.
Wen CableCheck analyse di foto for SynthID, di results show sey dem create am wit Google AI.
OLD FOTO OF PRIEST WEY HOLD GUN FOR CHURCH
Anoda viral image wey dem use push agenda of churchgoers wey hold guns na di foto of one man wey wear cassock, mostly Catholic priests, wey hold gun.
One Facebook page identified as Chinedu Anichi TV wit ova 88,000 followers post di foto come write: “Na di only way di remaining Nigerian Christians fit go. Worship on Sunday. True true kontri don finish”.
CableCheck discover sey di foto of di Catholic priest don dey internet since 2017. Dem bin use di foto wela for dis kain tok some years ago.
In May 2022, TheCable published one fact-check report to check di claim wey tok sey di cleric for di viral foto bin dey cari gun to protect himself from protesters for Sokoto wey bin dey call for di release of suspects wey dem arrest in connection wit di murder of Deborah Emmanuel, one female student for Shehu Shagari College of Education, Sokoto state.
Dem bin kill Deborah burn am sake of “blasphemous comments”.
