One viral post claim sey Okezie Ikpeazu, former govnor of Abia, collect death sentence by hanging sake of sey im allegedly divert N1 trillion public funds.
According to di post, investigators trace di moni reach Ikpeazu foreign account for Australia. E come claim sey dem bin originally keep di moni for di Abia International Airport and one light rail project.
Di post also claim sey one “Justice Chukwuemeka Nwogu” deliver di judgement, and im allegedly tok sey di evidence against Ikpeazu bin “full ground” and dat kain “betrayal” of Abia pipu need di “highest penalty”.
E add sey di former govnor bin dey under heavy security watch as officers bin dey try see how dem go recover di stolen funds.
Di claim don waka evriwhere for X and Facebook as you go see here, here and here.
WETIN WE CHECK
CableCheck look sections 98 of di criminal code act discover sey even though corruption dey bring prison for public office holders, death sentence no follow di punishment under di Nigerian law.
Search of di Abia state judiciary website no folo show any record of one Justice chukwuemeka Nwogu for bench.
Also, no confam news media report dat kain conviction. Di way Ikpeazu title as forma govnor cari weight, dat kain case for don dey local and international media.
CableCheck also folo John Kalu, former commissioner for trade and investment for Abia, who dismiss di claim, say Ikpeazu no get any criminal case anywhere for di world.
FINAL TOK
Di claim wey sey Okezie Ikpeazu collect death sentence becom im divert ₦1 trillion no correct.Di judge wey dem call no exist, and Nigerian law no dey prescribe death sentence for corruption.
