One video wey show as President Bola Tinubu dey threaten Nigerian citizens wey dey call im statements AI don go viral for WhatsApp.
For di one-minute video, Tinubu assure sey “full consequences” go fall out from di “disrespect.”
“Make evribodi know sey from today, wenever I Bola Ahmed Tinubu release press statement, I no expect pipu to yab me or call me AI,” na so im tok.
“I be living breathing man wey don fight, serve, and sacrifice for dis nation. Any bodi wey dare to comment AI under my statement go face di full consequences of dia disrespect. We no go tolerate disrespect for internet wey disguise as play play.
“And to those pipu below 30 years, understand dis one wella; you no go call me Tinubu, you go call me President Bola Ahmed Tinubu or Mr. President.
“No be shoulder I dey cari, na order. Nigeria must return to culture of respect and responsibility. Enough is enough.”
WhatsApp show sey di video bin dey “forwarded many times.”
Di clip comot from one TikTok account named @uncle_tarrmie wit 15.5k followers.
Checks through im account show sey di video no dey di page again.
However, plenti videos show as Tinubu dey make announcements wey no get head.
Some of dem na “heartbreak allowee from di govment”, “Presidency congratulate Davido and Chioma”, “President Tinubu don join Wizkid FC”.
Although di user tok sey im videos na AI, some pipu still dey share am to misinform di public.
Plenti AI videos bin folo dey di page as part of tori series wey di creator title “The Dark Pastor”.
“My Videos na AI. I no get intentions to mislead di public,” na so di TikToker write for im account as im encourage social media users to connect wit am.
