One foto wey don waka for social media show as Peter Obi, presidential candidate of di Labour Party (LP) for 2023, dey kneel down to greet President Bola Tinubu.
Social media users wey post di foto claim sey Obi kneel down greet Tinubu during di inauguration of Pope Leo XIV for Rome, Italian capital.
On May 20, one Facebook user identified as Atu Lazarus post di viral image write: “Peter Obi don win my heart. Im kneel down for my papa. Make im calm down. Im suppose join hand wit Tinubu fix Nigeria”.
Anoda Facebook user identified as Pankwaye Bulus Kanam post di foto write: “Peter Obi bin kneel down for President Bola Ahmed Tinubu for di Vatican church. Di same Obi wey bin dey raise dust against di president”.
Di foto folo comot here, here, and here.
WETIN HAPUN BEFORE
Di installation mass of Pope Leo XIV bin hapun for Saint Peter’s Square inside di Vatican City, on May 18,
Leo bin dey elected as di new leader of di Catholic Church on May 8, afta Pope Francis, di pope before am, die.
Many world leaders, including Tinubu, attend di installation mass.
For di mass, Tinubu bin folo Kayode Fayemi, forma govnor of Ekiti, and Obi, tok. Di both of dem be strong Catholics.
Bayo Onanuga, Tinubu special adviser on information and strategy, publish one statement wey describe as Tinubu greet Obi and Fayemi for di mass.
Onanuga bin tok sey na Fayemi first see di president where im bin sidan wit oda leaders before im cari Obi folo am go “pay homage” to Tinubu.
“As im reach di President, Fayemi scata di tension between Obi and Tinubu. Im tok sey: ‘Mr. President, welcome to our church, and thank you as you for honouring di Pope with your presence.’ President Tinubu, wey sharp, tok sey, ‘Na me suppose welcome you and Peter. Na me be di Head of di Nigerian Delegation.’ Wetin di President tok funny Obi, wey agree wit di President,” na so Onanuga write for X.
Onanuga also post foto of di interaction between di three men for di installation mass.
Obi folo post statement wey tok sey im greet Fayemi and Tinubu for di mass.
Pictures and videos wey show Tinubu togeda wit oda Nigerian religious and political leaders comot for social media afta di event.
As di religious gathering pass, Tinubu and Obi supporters begin argue about how di two politicians dey stand for di world.
As dem dey debate, di viral foto comot for social media.
WETIN WE CHECK
One close look at di viral foto show sey dem touch am to fit di narrative. Na computer dem use put di figures for di viral foto.
For di viral picture, Obi hand look like sey dem join am — proof sey dem don touch di foto.
More checks also show sey Olusegun Dada, di president special assistant on social media, post di original foto for X on May 18.
For di foto wey Dada post, Tinubu dey sedan only am for front seat as Fayemi and Obi dey try see di president.
Valentine Obienyem, Obi media adviser, release statement wey tok sey di viral foto dey “clearly photoshopped”.
FINAL TOK
Di foto wey show as Obi dey kneel down for Tinubu for Rome na photoshop.
