One Facebook page — Republicans for United States of Biafra — don post one video wey dem use artificial intelligence do. For di video, US President Donald Trump bin dey call for di release of Nnamdi Kanu.
Di page wey get more dan 2,700 followers post di video on February 19.
Di video don gada pass 20,000 views, 200 shares, and 40 comments since dem post am.
In di less dan one-minute video, one figure wey resemble Trump dey tok as im go free Kanu, leader of di Indigenous Peoples of Biafra (IPOB), from di Nigerian govment hand.
Trump also allegedly tok sey im administration go make sure sey dem allow “Biafra people” conduct election.
Dem create di page in April 2020 to share and promote contents weu dey support di agitators’ views.
On February 18, di page share one AI-generated video wey show as Trump dey support di mata.
WETIN WE CHECK
Close observation of di video show sey Trump image bin dey digitally manipulated to make am look like sey di US president bin dey deliver speech.
Di mouth region bin no clear, and e look like sey dem put anoda picture ontop di foto to make am look like sey Trump bin dey tok.
CableCheck discover sey di video bin dey created using one website wey dey allow users create AI videos using di foto of some popular celebrities.
Di website dey allow users create AI videos using di images of Trump, Elon Musk, billionaire tech entrepreneur; forms US President Barack Obama; Kanye West, US rapper, among odas.
One feature for di website dey also allow users chuk di words wey dem want for di video.
FINAL TOK
Di video wey dey show as Trump dey call for Kanu release na AI.
