Ọtụtụ ozi na soshal mịdia ekwuola na ọkọlọtọ dị n’azụ onyeisi ala Bola Tinubu m̀gbè ọ na-agụpụta ozi n’ụbọchị Sunday bụ nke obodo Russia.
N’ozi ọ gụpụtara n’igwe onyonyo, Tinubu gwara ndị Naijiria ka ha kwụsị ngagharị iwe nke “End Bad Governance” ma nye ohere maka mkpakọrịta.
Tinubu kwuru na ndị ji ohere áhụ̀ eme ọgbaghara ga-enweta ezigbo ntaramahụhụ, ma gbakwunye na ọchịchị ya agaghị anabata okwu mmegide ọbụla nye agbụrụ ọbụla.
Nya bụ onyeisi ala kwuru ogologo okwu gbasara ihe ndị ọchịchị ya mepụtara. Ọ gbachitere iwu ndị ọ mere, ma kwuo na mkpebi ndị o nyere dị mkpa nye ọnọdụ akụ n’ụba Naijiria.
A hụtara nya bụ onyeisiala n’etiti ọkọlọtọ abụọ, ótù bụ nke Naijiria. Nke abụọ dị iche.
“Gịnị mere e jiri nwe ọkọlọtọ ọzọ n’akụkụ nke Naijiria? Tinubu ọ nọ na Russia, ka ọ bụ gịnị?” ótù onye na X dere.
Ụfọdụ ntụnye n’okpuru ozi a kwuru na ọ bụ nke obodo Russia, ebe ọtụtụ kwuputara ụjọ ha.
Nke a na-abịa dịka a hụtara ka ụfọdụ ji ọkọlọtọ ndị Russia, dịka ha na-eme ngagharị iwe.
A hụtara ka ụfọdụ nà-èfé ọkọlọtọ Russia na Kano, Jos, na Abuja n’ụbọchị Thursday.
Ndị ngagharị iwe ahụ kpọkuru Vladimir Putin, onyeisi ala Russia, ka ọ gbatara Naijiria ọsọ enyemaka. Ha bóró Tinubu ebubo na ọ na-emenyere obodo ndị ọcha.
KÈDÚ Ọ́KỌ̀LỌ̀TỌ̀ NỌ̀ N’ÁKỤ̀KỤ̀ TINUBU?
Ọkọlọtọ nọ n’akụkụ nke Naijiria nwere àgwà atọ — ọbara-ọbara, anụnụ-anụnụ, ọcha, ya na akwụkwọ ndụ. Ndị a bụ àgwà e ji mara onyeisiala Naijiria.
Àgwà anọ ndị ahụ bụ nke ndị agha Naijiria. Ọ na-egosị na Tinubu bụ onye isi ndị agha, ma bụrụkwa onye isi ala Naijiria.
O kwesịghị ka ọ gbagwojuo gị anya nye ọkọlọtọ nke ndị Russia nke nwere àgwà atọ — ọcha, anụnụ-anụnụ, ya na ọbara-ọbara.
