Ótù onye na Facebook ekwuola na Pope Leo na ụfọdụ ndị Bishop yọrọ onye isiala Bola Tinubu ka ọ tọpụ Nnamdi Kanu, onye ndu otu na-achọ nnwere onwe bụ́ Indigenous People of Biafra (IPOB), na ngá.
Okwu a nke @NgoziCommedy bipụtara, bụ nke e jiri ihe ngosị ebe Tinubu na ụfọdụ ndị Bishop na-akpa ńkàtá sochie.
Ihe ngosị nkeji abụọ na tinkom tinkom iri abụọ n’itoolu a enwetala nkiri puku ise na ụma narị itoolu (5.9k views), nkwenye iri isii (60 reactions), ntụnye ọnụ iri n’atọ (13 comments), na nkesa iri n’isii (16 shares).
“Pope Leo nke iri na isii na ụfọdụ ndị Bishop ayọla Tinubu ka ọ tọpụ Nnamdi Kanu na ǹgá, ka udo chịa na mpaghara south-east,” ozi ahụ kwuru.
Asafe ọzọ akpọrọ @United Nations Mission for Referendum in Biafra Land biputakwara ozi dịkwa ka nke a, ma kwuo na Pope Leo yọrọ ọchịchị Naijiria ka ọ tọpụ Nnamdi Kanu na ǹgá iji kwalite udo na Naijiria nakwa na Afrika.
A nwụchiri Kanu na na afọ 2015, mgbe a sịrị na o mere mpụ megide obodo ya, mana e mechara hapụ ya mgbe o zutechara ọnọdụ niile e nyere ya.
Ọ gbapụrụ Naijiria ka a tọpụrụ ya na ǹgá mgbe ahụ, mana a bịara nwụchikwa ya ọzọ n’afọ 2021 n’ụzọ nwere ka ọ dị.
Mkpọchi ya na ǹgá kpalitere ọtụtụ ị́gba akwụkwọ n’ụlọ ikpe, tinyere ụfọdụ ndị na-akpo maka ntọhapụ ya na ǹgá.
ÍNYÒCHÀ ÓKWÚ À
CableCheck nyochara akụkụ ihe ngosị ahụ, ma chọpụta na ọ pụtara ìhè mgbe e hibere Pope Leo dịka onye isi ụka Catholic.
Mmemme a nke e mere n’ụbọchị asatọ nke ọnwa May bụ n’ihi ọnwụ Pope Francis nwuru n’ụbọchị iri abụọ n’otu nke ọnwa April ka ọ rịachara ọrịa ogologo oge.
Onyeisiala Bola Tinubu so na ndị a ma-ama bịara nya bụ mmemme.
N’akụkụ nya bụ mmemme, Tinubu na ụfọdụ ndị Bishop sò na ndị si Naijiria bịa Vatican zutere ịnwe mkpakorita ụka.
N’ihe ngosị nke ezigbo ya, a nụrụ ka ndị Bishop ahụ na-ekele Tinubu maka ime ka ọbịbịa ha na Vatican nwe isi, ya na iwepụta oge ịbịa nya bụ mmemme n’onwe ya.
Pope esoghị na ndị nọ n’ime ụlọ ebe Tinubu na ndị Bishop a na-enwe mkparịta ụka a. O nweghịkwa mgbe ha jiri yọ Tinubu ka ọ tọpụ Kanu na ǹgá.
Anyị chọpụtara na asafe ndị biputagasịrị nya bụ okwu na-akwado otu nnwere onwe Biafra.
Na mgbakwunye, onweghị ụlọ ọrụ nzisa ozi a mara ọfụma biputara nya bụ ozi.
ŃCHỊ́KỌ́TÁ
Okwu na Pope Leo na ndị Bishop yọrọ Tinubu ka ọ tọpụ Kanu na ǹgá bụ asị.
